ហ្វាំងឡង់៖ នាយករដ្ឋមន្ត្រីហ្វាំងឡង់ លោកស្រី Sanna Marin ដែលលាលែងពីតំណែងបានដាក់ពាក្យសុំលែងលះពីស្វាមីរបស់លោកស្រីគឺលោក Markus Raikkonen បន្ទាប់ពីបានរៀបការជាមួយគ្នាអស់រយៈពេល ៣ឆ្នាំ។ នេះបើតាមការបញ្ជាក់របស់ពួកគេទាំងពីរនាក់នៅលើបណ្តាញសង្គម Instagram កាលពីថ្ងៃពុធម្សិលមិញនេះ។ 

នៅលើបណ្តាញសង្គម Instagram អ្នកទាំងពីរបានសរសេរថា យើងពិតជាអរគុណនូវពេលវេលារួមគ្នារយៈពេលជាង ១៩ឆ្នាំ រួមជាមួយកូនស្រីដ៏គួរឱ្យស្រឡាញ់ម្នាក់។ យ៉ាងណាក្ដី ពួកយើងនៅតែជាមិត្តនឹងគ្នាដដែល។ 

លោកស្រី Sanna Marin និងលោក Markus Raikkonen ដែលរហូតមកដល់ពេលថ្មីៗនេះនៅតែបន្តបំពេញការងាររួមគ្នានៅក្រុមហ៊ុនបណ្តាក់ទុនមួយ បានព្រមព្រៀងគ្នាចែករំលែកសិទ្ធិជាមេបាលើកូនស្រីម្នាក់ដែលមានវ័យ ៥ឆ្នាំជាចំណងដៃនៃអាពាហ៍ពិពាហ៍។ ពួកគេទាំងពីរនាក់បានរៀបការកាលពីឆ្នាំ២០២០ គ្រាដែលលោកស្រី Sanna Marin កំពុងកាន់តំណែងជានាយករដ្ឋមន្រ្តី ដែលជាពេលវេលាមមាញឹកនៃការដោះស្រាយវិបត្តិទាក់ទងនឹងកូវីដ-១៩។ 

គួរបញ្ជាក់ថា លោកស្រី Sanna Marin និងគណបក្សសង្គមប្រជាធិបតេយ្យរបស់នាងបានចាញ់ការបោះឆ្នោតសភាប្រទេសហ្វាំងឡង់កាលពីខែមុន ដោយមានសំឡេងគាំទ្រតាមពីក្រោយគណបក្សសម្ព័ន្ធជាតិស្តាំនិយម ក៏ដូចជាគណបក្សជាតិនិយមហ្វាំងឡង់។ លោកស្រី Sanna Marin បច្ចុប្បន្នមានវ័យ ៣៧ឆ្នាំ គឺជានាយករដ្ឋមន្ត្រីវ័យក្មេងបំផុតរបស់ពិភពលោកនៅពេលនាងចូលកាន់តំណែងក្នុងឆ្នាំ២០១៩ ត្រូវបានអ្នកគាំទ្រជុំវិញពិភពលោកចាត់ទុកថាជាគំរូមួយសហស្សវត្សរ៍សម្រាប់មេដឹកនាំថ្មីដែលរីកចម្រើន បើទោះបីជាបច្ចុប្បន្ននេះប្រជាជនហ្វាំងឡង់បានបោះឆ្នោតគាំទ្របេក្ខភាពមេដឹកនាំរដ្ឋាភិបាលហ្វាំងឡង់ថ្មីរួចទៅហើយក្តី៕